Nei 150 jier is de wolf ek werom yn Fryslân. Mei in fêststeld territorium
op de grins fan Drinte en Fryslân libje al in skoft twa wolven. Dit jier is de
kâns op rûdelfoarming grut. Mei de komst fan de wolf en de deade skiep nimt ek yn
Fryslân de diskusje wer ta. Guon wolle in stek om Fryslân, in oar wol sjitte en
wer oare partijen hjitte de wolf wolkom. De diskusje ferhurdet ek. Guon prate
oer wolvefans en oaren oer -haters. Wa't nei Dútslân sjocht wit dat wy hjir yn
Fryslân noch mar oan it begjin stean fan in diskusje dy't mooglik mear en mear
polarisearje sil.
Wa't mear feitlik nei de situaasje sjocht wit dat de wolf Europeesk de heechste
beskerming hat. Resinte ynspanningen yn it Europeesk parlemint om dat te feroarjen
binne oant no ta gjin sukses. It politike proses is tige taai. Pas by in fêststeld
probleemgefal, in saneamde probleemwolf, kin yn it uterste gefal in wolf fuortsketten
wurde. Resinte gefallen yn Dútslân hawwe sjen litten dat in rjochter dêr net
gau yn mei gean sil. Meastentiids lei de rjochter in ferbod op om te sjitten.
Yn dit gefal hat de Provinsje sels gjin inkelde mooglikheid om hjir wat oan te
dwaan. Dat is in boadskip dat net elkenien hearre wol. Feitlik kin de provinsje
neat oars dwaan as it stimulearjen fan preventive maatregels foar feehâlders.
Ferline wike makke de Provinsje bekend dat sy foarearst in €350.000 útlûke. Der
komt in konsulint foar ynformaasje en feehâlders kinne subsydsje krije foar
nachtfakken en wolfwerende maatregels. Dat freget ek wat fan de feehâlder. Nei
150 jier is der wer in toppredator neist de minsk yn it lân. De oare kant is
dat wy 150 jier lang de lúkse hân hawwe dat it fee relatyf feilich bûtendoar
stean koe.
Wy hoopje dat wy it petear mei inoar oan gean kinne op basis fan feiten. De
fraksje hat him ta it uterste ynspand om de subsydzjeregeling fan de grûn te
krijen, ús iennichste foech, en wy binne ek wiis mei de stap fan it Fryske
kolleezje. It soe goed wêze dat lanlik
ek de diskusje fierd wurde soe oer in regeling foar de kosten fan de ekstra
arbeid. Mooglik lizze hjir ek binnen it GLB (Europeeske lânboubeleid) kânsen.
In lobby om mear jild sil op koarte termyn mear úthelje as in lobby foar
feroaring fan de status fan de wolf. Oant dy tiid kin de Provinsje net oars as de
skieppe- en feehâlder yn'e mjitte komme en fynt de feehâlder dêr in bûnsmaat yn
by de FNP.
Sijbe Knol, fraksjefoarsitter
Wopke Veenstra, wurdfierder lânbou en natuer
FNP Steatefraksje
Frysk 
Nederlands
English
